Nueves titulaciones

Nestos cuatro años punximos en marcha dellos graos y másteres con munchu éxitu, como, por exemplu, el Grau d’Inxeniería n’Organización Industrial o’l Máster de Caminos, Canales y Puertos. Tamién punximos en funcionamientu la Comisión Estratéxica de Titulaciones con un oxetivu que ye empobinar a la universidá na puesta en marcha de nuevos estudios.

Nesti nuevu mandatu, vamos caltener los trabayos de la comisión y vamos evaluar les sos conclusiones por aciu de la realización d’estudios d’oportunidá ya impactu económicu. Vamos buscar l’autorización del Principáu d’Asturies para poner en marcha los trés graos qu’algamaron un importante consensu na comunidá universitaria sobro la so implantación, como son el Grau en Criminoloxía, Grau en Ciencia ya Inxeniería de Datos, apocayá aprobáu pol Conseyu Social, o los rellacionaos con enerxíes anovables, sosteniblidá y economía circular. Vamos estudiar la oportunidá d’entamar los estudios de Filoloxía Asturiana y la posibilidá d’introducir la llingua asturiana nes memories de verificación de dellos graos y másteres. Vamos siguir desarrollando les iniciatives de Programaciones Conxuntes de Grau o Máster y los novedosos graos o másteres abiertos. Vamos intentar dar cabida a les iniciatives pa poner en marcha los programes de Formación Dual universitaria. Vamos entamar, ellí onde seya conveniente, los programes integraos de grau y máster, sobremanera na fastera d’Inxeniería y Arquitectura. Dinamizaremos la nuesa ufierta de másteres pa que seyan un noyu de retención del nuesu estudiantáu y d’atraición d’estudiantes nacionales ya internacionales. Vamos afitar el nuesu llideralgu nacional en programes de Máster Universitariu Erasmus Mundus, reforzando les estructures específiques pa la so xestión y potenciando nueves iniciatives con un sofitu decidíu nel procesu de solicitú.


Itinerarios billingües

L’afitamientu sostenible de los programes o itinerarios billingües fueron un apueste d’esti equipu de gobiernu pa diseñar una ufierta amplia. Nesti sentíu, vamos promover la puesta en marcha de nuevos itinerarios billingües y que tolos esistentes impartan, siquieramente 120 ETCS n’idioma inglés. Pa ello, vamos plantegar incentivos específicos p’asignatures que s’impartan per primer vegada n’inglés. Va asignase a cada área una capacidá docente doble de la que necesiten eses asignatures.


Programaciones Conxuntes d’Estudios Oficiales (PCEOs)

Les Programaciones Conxuntes d’Estudios Oficiales (PCEOs) amosaron ser ún de los estudios más exitosos y con mayor demanda de la universidá. Apocayá, aprobáronse unes directrices que van facilitar el so desarrollu, a les que s’afayaron les PCEOs existentes, Matemátiques-Física, Inxeniería Civil-Inxeniería de los Recursos Mineru y Enerxéticu y Alministración d’Empreses-Derechu. Sedrá un oxetivu preferente pa esti nuevu periodu la implantación de nueves PCEOs, tanto de graos como de másteres. L’apueste va emprimar cola PCEO ‘Matemátiques-Inxeniería Informática del Software’ que s’atopa nuna fase bien avanzada


Graos abiertos

El futuru de la formación universitaria pasa pola confección de graos abiertos de mou que vamos estudiar la fórmula más afayadiza, acordies cola propuesta de cambéu del RD 1393, pa desarrollar esti conceutu de la forma más conveniente pa la Universidá d’Uviéu. Nesti nuevu mandatu vamos poner en marcha esta iniciativa, de mou que la nuesa universidá disponga d’una ufierta cuasi personalizada de titulaciones.


Sistema d’evaluación del profesoráu

Nesti mandatu retomamos el desarrollu del Programa DOCENTIA, qu’anguaño s’atopa en fase pilotu, ralentizada pol confinamientu y la paralización de los plazos alministrativos xeneraos pola pandemia. Esta ferramienta va ser un elementu fundamental pal llogru del yá anunciáu sexeniu docente y va facilitar el llogru de acreitaciones de profesor titular y catedráticu. Amás, va ser un preséu bien útil pa meyorar la xestión de la calidá de les titulaciones. Nesti nuevu mandatu vamos rematar la so puesta en marcha y vamos incentivar la participación del profesoráu nel procesu d’evaluación.

Garantizaremos la cobertoria plena de les necesidaes de profesoráu, especialmente a entamu del cursu, adelantando los concursos de contratación del profesoráu hasta onde seya posible y habilitando llistes d’espera pa cubrir les posibles incidencies.


Acreitación institucional y sellos internacionales

En xineru de 2020 la Escuela Politéunica d’Inxeniería de Xixón llogró la certificación de la implantación del programa AUDIT, lo que darréu-y dexó llograr la acreitación institucional. Esti llogru sofítase nel Sistema Integráu de Xestión de calidá de la Universidá d’Uviéu que da sofitu a tolos centros y que va dexar a otres escueles y facultaes siguir los sos pasos. Al empar dende l’equipu de gobiernu garantizóse a los centros la financiación necesaria pa poder encarar los procesos d’acreitación internacional. Llueu d’esti sofitu avanzóse na consecución de l’acreitación ACBBS de la Facultá d’Economía y Empresa y consiguiéronse sellos institucionales otorgaos por ANECA como EUROACE pal Máster Universitariu n’Inxeniería de Mines, EUROInf pal Máster Universitariu n’Inxeniería Web o’l IChemE pal Grau d’Inxeniería Química de la Facultá de Química. Nesti nuevu mandatu vamos siguir fomentando y emprestando’l sofitu téunicu y económicu pa la preparación, llogru y caltenimientu de certificaciones y sellos de calidá en cuantos centros, departamentos o institutos s’amiesten a estos necesarios procesos.


Programes de doctoráu

Los programes de doctoráu merecieron especial atención pela nuesa parte. Dotáronse de les mesmes ferramientes que los graos y los másteres universitarios. Pa ello, punxéronse en marcha informes añales de siguimientu de los programes, que facilitaron la renovación de l’acreitación de tolos nuesos doctoraos nun periodu de dos cursos académicos. Amás, creáronse encuestes de satisfaición pa doctorandos y doctorandes, doctores y doctores y personal docente ya investigador.

Decidimos el trespasu de la xestión de los programes a los departamentos ya institutos d’investigación, lo que yá ta averando y optimizando la so xestión. Nel planu formativu, desendolcamos dende’l INIE una importante ufierta de cursos pa la formación de doctorandos lo que nos asitia bien percima d’otres universidaes. Nel nuevu mandatu, vamos siguir esta llinia d’aición que nos lleve a un aumentu del númberu de tesis doctorales presentaes cada añu.


Innovación docente

Ensin dulda la universidá del futuru va riquir d’una forma d’enseñar distinta. L’usu de la teunoloxía, de nueves metodoloxíes docentes y la formación a distancia o semipresencial son retos que necesariamente vamos tener qu’encarar. La suspensión de les actividaes docentes presenciales que se dio nel mes de marzu dexónos pulsiar la nuesa capacidá d’adaptación y el desempeñu del nuesu profesoráu na docencia en redolaes híbrides. Los resultaos, anque siempres meyorables, fueron altamente satisfactorios gracies al esfuerzu de tola comunidá educativa. Nesti sentíu, vamos caltener y vamos reforzar los planes pa l’adaptación de la docencia a los contestos híbridos (semipresencial y online) col fin de siguir sofitando al profesoráu nel so esfuerzu pa faer frente a les situaciones sobreveníes que pueda causar la crisis sanitaria de la Covid19. Pa materializar esos planes con recursos abondos, vamos crear un equipu de persones de sofitu a les actividaes docentes a distancia o semipresenciales del PDI y vamos reforzar tamién l’alquisición de llicencies software.

Nos vinientes años l’aición conxunta del Institutu d’Investigación Educativa y el Centru d’Innovación Docente va dexar desarrollar nueves aiciones y convocatories. Vamos desarrollar el conceutu de grupu d’innovación docente a imaxe y semeyanza del grupu d’investigación p’axuntar profesoráu con iniciatives innovadores y sofitalos con financiación. Potenciaremos el nuesu Plan d’encontu al espardimientu y promoción d’actividaes docentes innovadores dotándolu de más financiación y recursos.

Vamos reforzar tamién la ufierta d’enseñanza n’abierto que se vien faciendo dende 2018 al traviés de la plataforma UNIOVIX basada na adaptación del software de OpenEdx. Estos cursos, colos que nos averamos a unes 5.000 persones, son una importante contribución a la responsabilidá social de la nuesa universidá.

Vamos insitir, como nos postreros cuatro años, nes solicitúes énte’l Gobiernu del Principáu d’Asturies, llogrando aprobar el mayor númberu de places de la década cabera