DSC_1098

Querida universitaria, queríu universitariu:

Ta averándose’l procesu d’eleición d’un nuevu equipu de gobiernu pa la Universidá d’Uviéu. Anque formalmente escoyemos al nuesu Rector pal periodu 2016-2020, de fechu tamos decidiendo l’equipu col que vamos a tratar pa llevar alantre les actividaes de nueso na universidá. Poro, ye mui importante que sofitemos al candidatu nel que más nos enfotemos, que garantice la tresparencia na información, qu’ufierte diálogu y cercanía nel tratu, que busque la eficiencia nos servicios y qu’afale la participación y el consensu na toma de determín.

A lo llargo de dos años fice por esplicar estos plantegamientos en tola Universidá d’Uviéu, intentando llegar a tola comunidá universitaria. La campaña eleutoral ye una perbona ocasión pa enanchar el contautu con toes vosotres y toos vosotros y p’afondar na esplicación de les propuestes calteníes nel nuesu programa eleutoral. Nél, quiximos sintetizar les nueses idees y propuestes pa tolos coleutivos universitarios, empobinaes toes elles a algamar un nuevu mou de trabayar na universidá, que llogre integrar los esfuerzos de toes y toos, onde los oxetivos seyan claros y con unos recursos d’aplicación ellí onde se dea una necesidá y con una información que vaya de mou natural, dende y hacia l’equipu rectoral.

Fairemos por garantizar unes condiciones de trabayu y serviciu dignes, que seyan un ñiciu na nuesa universidá y que nos dexen la posibilidá de ser una institución avanzada y modélica; que seya granible pa los estudiantes, pal personal d’alministración y servicios y pal profesoráu. Los nuesos oxetivos pasen por una simplificación de reglamentos y normatives y por remanar procedimientos más eficaces, eficientes y áxiles, acordies coles necesidaes d’una universidá del sieglu XXI. Nós queremos centros, departamentos y servicios qu’ufran una atención más averada, con abondos recursos, con personalidá y autonomía p’algamar niveles docentes, d’investigación y de xestión d’alta calidá, y que compitan colos qu’ufierten les meyores universidaes europees.

Hemos xestionar con procuru y cola máxima tresparencia los llimitaos recursos financieros pa llograr los nuesos oxetivos. Trabayaremos con puxu y de mou proactivu p’algamar un aumentu de fondos, tanto públicos como d’iniciativa privada, col envís de recuperar y superar los niveles de financiación de más altor de los llograos pola institución. Ello llevará darréu a una mayor calidá de los nuesos resultaos docentes y a un mayor impulsu de la nuesa investigación, tresferencia y estensión universitaria.

Los oxetivos de nueso son ambiciosos, como correspuende a un proyeutu estratéxicu de llargu percorríu. Tamos enfotaos en que vamos cuntar con nueves ilusiones, col compromisu y cola necesaria incentivación pa llograr el reconocimientu internacional y la integración efeutiva nel sistema económicu, social, cultural ya intelectual del Principáu d’Asturies. Pa da-yos entamu a estos planes vamos cuntar con un equipu de gobiernu diversu, paritariu y respresentativu, nel que s’amiesten persones comprometíes y dedicaes, que van trabayar de mou dafechu coordináu y pondrán en práutica un facer averáu a tola comunidá universitaria.

Pela mio parte, doi la mio pallabra y comprométome a poner tola enerxía y capacidá, al llau d’un equipu afayadizu y cercanu, p’algamar los oxetivos, les propuestes y los finxos calteníos nel nuesu programa eleutoral, asina como pa someteme al control internu y esternu al traviés d’una xestión tresparente, abierta y participativa.

Aguardando cuntar col to sofitu, mándote un saludu candial.

Santiago

Programa