El documentu de CRUE sobro la universidá 2030 establez que la futura financiación ha definir riegles d’evolución de los recursos que, promoviendo los fines y analizando les resultaos, tomen en consideración aquelles rixideces de costos qu’operen nes universidaes. La situación actual de les universidaes públiques ye consecuencia de decisiones anteriores, internes y esternes a la institución ya inclusive de raigañu hestóricu y que la regulación camudó en costos estructurales.

La universidá d’Uviéu ellaboró’l so plan estratéxicu pal periodu 2018-2022 que foi aprobáu pol Conseyu de Gobiernu y pol Conseyu Social.  Esti plan ta alliniáu col Plan de Financiación suscritu col Gobiernu del Princioado d’Asturies pal mesmu periodu y que ta executándose, y cumpliendo los sos oxetivos, magar les dificultaes financieres poles que tán pasando les universidaes y de les que la nuesa universidá nun ye una esceición.

La xestión económico-financiera constitúi una auténtica exa tresversal de cualquier organización. Al ser la nuesa universidá una organización llargamente descentralizada na so xestión, la tramitación interna de cualquier aspeutu presupuestariu repercute nes actividaes docentes o investigadores. Per otra parte, les dotaciones pa faer frente a les nueses misiones tienen que ser abondes p’acometeles con ciertes garantíes. Dizlo l’artículu 79.1 de la Llei Orgánica d’Universidaes cuando se garantiza “que les universidaes dispongan de los recursos necesarios pa un funcionamientu básicu de calidá”. La nuesa misión como xestores universitarios ye trabayar collaborativamente cola alministración autonómica pa reivindicar y llograr el so cumplimientu.

En rellación colos nuesos procedimientos internos, asistimos durante los últimos años a un verdaderu cambéu de paradigma, con mayor protagonismu de los procesos de tramitación electrónica. Con ello intentamos simplificar la xera al Personal Docente ya Investigador, asina como al Personal d’Alministración y Servicios responsables de los centros de gastu. Una tresformación dixital qu’esixe una planificación y una importante inversión n’equipos y programes.

Vamos implementar les midíes que seyan necesaries, tanto téuniques como procedimentales, pa poner en funcionamientu’l “Modelu de contabilidá analítica pa Universidaes”, consensuáu dientro del Grupu de Trabayu mistu CRUE-MECD y con asesoramientu de la IGAE, del que formamos parte. Esti modelu va entamar a aplicase nel 2021 y constitúi una simplificación y homoxeneización de criterios, basándose nel rigor y respetando los principios fundamentales p’algamar los oxetivos marcaos pola llegalidá vixente na materia.


Plan de financiación

L’alcuerdu robláu ente la Universidá d’Uviéu y el Principáu l’añu 2017, vixente hasta 2021, prorrogable al exerciciu 2022, garantizó durante los últimos años la financiación de los nuesos gastos corrientes. Amás, fizo posible cuntar con pequeñes inversiones pa la renovación y modernización d’infraestructures.

Sicasí, la economía española entró cola COVID-19 nun escenariu llaráu d’incertidumes. Asturies nun va ser una esceición. Nun ye daqué arriesgao camentar que la educación superior y la financiación de les Comunidaes Autónomes van vese afectaes por grandes tensiones presupuestaries.

El siguiente mandatu rectoral va tener como ún de los sos principales desafíos anovar esti contratu-programa a partir del so periodu de vixencia. El nuesu oxetivu va ser consiguir una financiación básica que cubra’l 100% de la nominativa y los gastos corrientes de la institución, asina como caltener la compensación pola baxada de precios públicos de les nueses matrícules. Esta financiación tendría d’acompañase d’un plan d’infraestructures afayáu a una realidá de 52 edificios y fuertes necesidaes teunolóxiques. Tamién vamos incluyir un plan de financiación por oxetivos que dexe encarar a la nuesa institución retos de caláu n’investigación y tresferencia, asina como entamar proyeutos singulares y estratéxicos p’Asturies, nes llinies d’investigación de nuesos clústeres d’I+D+i.


Presupuestu de centros, departamentos ya institutos

A lo llargo de los postreros cuatro años, la nuesa idea-fuerza na gobernanza económica foi impulsar que centros y departamentos tuvieren la mayor capacidá presupuestaria propia pa poder desarrollar los sos oxetivos. A la escontra de modelos centralistes onde los órganos de la universidá tomen mesmamente les decisiones doméstiques de menor caláu, el nuesu mandatu carauterizóse por da-yos un ampliu marxe de decisión nos asuntos que-yos afecten.

Por eso aplicamos meyores a los sos presupuestos mui percima de la medría del propiu presupuestu de la universidá. Nel mesmu sentíu, nesti últimu añu entamamos a dotar a los institutos d’investigación d’un modestu presupuestu qu’asegure’l so funcionamientu básicu. Nesti nuevu mandatu vamos afitar esta llinia d’actuación, comprometiéndonos a aumentar siquieramente un 25% el presupuestu de les unidaes de gastu descentralizaes. Amás, vamos facer retornar a los departamentos ya institutos d’investigación una parte de los overheads de los proyeutos que llogren captar.


Contratación

La contratación pública ye una de les fasteres más problemátiques de la xestión económica y alministrativa. La so complexa normativa, según les esixencies d’una tramitación garantista y tresparente, faen d’ella un procesu llargu y cansu. Agora bien, durante esti mandatu reforzamos los servicios de la Xerencia rellacionaos con esta responsabilidá, con especial enfotu na alministración electrónica de les llicitaciones, la formación y l’información hacia y pa los centros xestores, implementando con eficacia los cambeos lexislativos que, de contino, se dieren.

Nel próximu mandatu vamos consolidar y vamos reforzar la estructura del serviciu de contratación, asina como la formación continua na materia, dotando a la xestión contractual d’una mayor eficacia y eficiencia.


Rindición de cuentes

La nuesa llexislación esixe aprobar y rindir añalmente les cuentes de l’Alministración Universitaria. Un itinerariu qu’inclúi’l so alderique y conformidá pol Conseyu de Gobiernu y pol Conseyu Social de la nuesa institución, pa la so postrer remisión al Principáu d’Asturies, tanto a la Conseyería correspondiente como a la Sindicatura de Cuentes.

Cumplir con dilixencia estes esixencies tien de siguir siendo un oxetivu común, que nun lleve darréu xenerar torgues que faigan difícil el cumplimientu de los nuesos fines y proyeutos, y qu’otorguen a la sociedá asturiana y la comunidá universitaria’l conocimientu necesariu y suficiente sobro l’usu afayadizu y tresparente de los recursos que se ponen a la nuesa disposición. Pa ello va ser necesario una adecuación más acordies cola nuesa idiosincrasia, con actividaes específiques y forma de funcionamientu, y teniendo en cuenta la normativa y procesos sobro control internu.


Tresparencia

Va cuatro años la Universidá d’Uviéu atopábase calificada como opaca nos ránquines españoles de tresparencia. Esto suponía un importante problema d’imaxe pa la nuesa universidá. Nesti periodu dímos-y un impulsu fondu al nuesu portal de tresparencia qu’anovó dafechu la so estética, funcionalidá y conteníos. Con ello, la nuesa universidá pasó a asitiase nos primeros puestos de los ránquines que miden la tresparencia (Dyntra, Fundación Compromisu y Tresparencia). Tamién que se creó la Comisión de Tresparencia y Protección de Datos, con numberoses competencies nesta materia, ente otres, la ellaboración d’un informe añal sobro’l cumplimientu de la normativa de tresparencia.

Pal nuevu mandatu, el Portal de Tresparencia va meyorase cola integración de los indicadores colos sistemes de xestión (docente, económicu ya investigación) de mou que la información amosada tea dafechu actualizada, siendo l’ámbitu de xestión económico-presupuestaria, de personal y de rindición de cuentes, factores claves pa poner de manifiestu’l rigor téunicu y la calidá y seguridá de los nuesos procesos.


Calidá de los servicios universitarios

La creación del Comité de calidá en 2017 impulsó la definición d’indicadores de desempeñu y siguimientu que nos dexó identificar oportunidaes de meyora nos servicios universitarios. Al empar, revisamos dacuando’l 100% de les cartes de serviciu de presentación de los servicios universitarios. Son un exemplu de bones práutiques nos que s’arreya a les y los emplegaos nel llogru de resultaos.

Nesta llinia, vamos siguir potenciando’l llogru de certificaciones, como la ISO 9001:2015 qu’anguaño tien el Serviciu de Publicaciones o’l Llaboratoriu de Radiactividad acreditáu como Llaboratoriu d’Ensayu por UNE-EN ISO/IEC 17025:2005 qu’acredita’l Conseyu de Seguridá Nuclear.