Docencia

El llabor docente constitúi la esencia de la xera del profesoráu universitariu, que se traduz na formación de miles de egresaos y egresaes. Por esta razón resulta esencial pal desarrollu de la sociedá del conocimientu que l’actividá docente se faiga nes meyores condiciones y ensin que se vea apostrada o supeditada al desarrollu del restu de funciones del profesoráu universitariu. En llinia con esti oxetivu fundamental, llográronse importantes meyores nos postreros cuatro años, que tienen de caltenese y que se tán desendolcando al rodiu de les siguientes exes:

  1. Anovación. Apostamos pola anovación de la plantiya a partir del accesu a la figura de Profesor Ayudante Doctor, o les figures análogues del real decretu en víes de preparación, coles mesmes garantíes de promoción y estabilización.
  2. Impulsu a les convocatories de promoción y estabilización. Punximos en marcha unos criterios claros y estables pa la promoción y estabilización del profesoráu p’aprovechar tola tasa de reposición. Esti procesu de convocatories periódiques dexó amenorgar les bolses de profesoráu acreditáu y meyorar la progresión na carrera académica en condiciones de seguridá, rigor y equidá. Vamos caltener la vixencia d’estos criterios coles meyores que les circunstancies aconseyen, siempres col alcuerdu mayoritariu de la comunidá universitaria.
  3. Ampliar la meyora nos reconocimientos docentes. A lo llargo d’estos cuatro años creamos nuevos reconocimientos pal llabor investigador (publicaciones llograes y financiación de proyeutos, ente otros), la participación en distintos comités nacionales ya internacionales y aumentamos el reconocimientu pola dirección del trabayu fin d’estudios. L’oxetivu ye avanzar nesta llinia, incorporando nuevos criterios pal reconocimientu por otres actividaes académiques que tengan en cuenta la dedicación docente del profesoráu, tales como la participación en tribunales de trabayu fin d’estudios, sesiones d’evaluación o otres actividaes docentes, les actividaes d’innovación docente, investigadores, de xestión o de representación a nivel nacional o internacional. El nuesu oxetivu ye llograr el reconocimientu de la dedicación del profesoráu de mou integral, valorando la totalidá de la contribución individual a la consecución de los fines de la institución.
  4. Itinerarios billingües. Ampliamos el númberu d’itinerarios billingües. Fomentamos que los 120 ECTS riquíos puedan cursase de forma íntegra na Universidá d’Uviéu. Too esto orixinó la creación de nuevos grupos, lo que xunto cola disminución del tamañu d’éstos (reflexao de forma espresa nel procedimientu d’ellaboración del POD), supunxo un esfuerzu que tien de caltenese nel futuru.
  5. Trabayu Fin d’Estudiu. Tocantes a la xestión de los Trabayos Fin d’Estudios (TFE), aprobamos reglamentos pa los Trabayos Fin de Grau (TFG) y Trabayu Fin de Máster (TFM), ya implementóse una nueva aplicación informática coles mires de facilitar la so xestión electrónica. Avanzamos nel reconocimientu del llabor del tutor o tutora. Nel próximu mandatu vamos estender esti reconocimientu a los miembros del tribunal d’evaluación.
  6. Disminución de la máxima dedicación docente. Nesti mandatu cumplimos col importante compromisu electoral de llindar la máxima dedicación docente del PDI a 240 hores. Una vegada llograda la llimitación a 24 ECTS como dedicación máxima de nuesu PDI, el retu ye incorporar de forma xeneralizada nuevos reconocimientos por otres actividaes académiques.
  7. Sexeniu de Tresferencia. Nesti añu caberu, dimos en reconocer el sexeniu de tresferencia a efeutos de la exención docente, de forma equivalente al sexeniu d’investigación, daqué poco común nes universidaes españoles. Vamos caltener esti criteriu pa cualesquier otru tipu de sexeniu que pudiera establecese nel futuru como’l sexeniu docente.
  8. Collaboración Docente. El plenu desarrollu del programa de collaboración docente, pioneru n’España, dexó tanto al personal investigador como al personal d’alministración y servicios incorporase a llabores de sofitu a la docencia. Esta esperiencia docente ta dafechu reconocida pola ANECA. Nel próximu mandatu vamos introducir meyores na so xestión y aplicación y vamos ufiertar a les y los collaboradores un accesu preferente a los cursos de formación pedagóxica del Institutu d’Investigación ya Innovación Educativa (INIE).

Carrera académica y relevu xeneracional

La incorporación de nuevu talentu, l’anovación de les plantiyes y la baxada de la precariedá llaboral foi una prioridá nestos cuatro años de mandatu. Incorporamos más de 150 nueves places de Profesoráu Ayudante doctor a la nuesa universidá dende 2016 hasta 2020. Algamamos alcuerdos coles organizaciones sociales pa garantizar el plenu desarrollu de la carrera académica na Universidá d’Uviéu y punximos en marcha’l mayor plan de promoción y estabilización del PDI de tola hestoria de la nuesa institución académica, algamando en 2020 les 500 places.

Nesti nuevu periodu vamos caltener esta llinia fundamental d’actuación en recursos humanos pal PDI. Vamos potenciar la contratación de nuevos ayudantes doctores (o figures análogues) y vamos aumentar el númberu de contratos predoctorales con programes de collaboración docente (utilizaos por más de 1.500 persones) pa garantizar el relevu xeneracional na nuesa institución. Colos criterios aprobaos en 2016 pa la promoción y estabilización, vamos dar accesu al profesoráu asociáu acreditáu y a les y los acreditaos I3. Vamos tratar con fondu procuru la convocatoria de les tases por discapacidá llegalmente previstes.

Nel marcu de los nuesos alcuerdos cola representación social, establecimos criterios claros y estables pa desarrollar la carrera académica na Universidá d’Uviéu. Vamos plantegar la puesta en marcha d’un plan integral pa la convocatoria de places nes figures de profesoráu permanente, contratáu doctor, titular y catedráticu, según otres figures, llaborales o funcionariales, que llegalmente puedan introducise. Vamos dedicar especial atención a les árees con profesoráu más avieyáu y ensin perspeutives de relevu xeneracional al traviés de les convocatories de profesoráu ayudante doctor o contratos predoctorales. Vamos caltener les convocatories de places de profesoráu permanente naquelles árees onde haya profesoráu ayudante doctor acreditáu a contratáu doctor o titular, ensin restricciones d’antigüedá na plaza, esto ye, dende’l primer añu de contratu.

Vamos favorecer la estabilización del PDI que s’incorpora al traviés de programes d’excelencia como’l Ramón y Cajal, Beatriz Galindo, Sara Borell o Miguel Servet y otros programes nacionales o autonómicos, o europeos, como’l European Reseach Council (ERC).

Vamos desendolcar un plan d’especial protección pa les persones que tán completando la so carrera académica dempués d’un periodu llargu de serviciu a la universidá. El profesoráu mayor de 60 años va poder amenorgar progresivamente la so actividá docente, 1 creitu per añu hasta la xubilación, facilitando coles mesmes una transición gradual por aciu d’esi trespasu de xeres y responsabilidaes a les nueves xeneraciones de docentes.


Formación continua

La formación de nuesu PDI foi una esmolición pal equipu de gobiernu nesti mandatu. Razón pola que punximos en marcha, al traviés del Institutu d’Investigación ya Innovación Educativa (INIE), una ufierta formativa amplia y variada. La llegada de la pandemia y la enseñanza on-line, punxo de manifiestu la importancia d’esta formación y reciclaxe. Nos próximos cuatro años vamos siguir esta sienda de potenciación de la formación continua, amentando la ufierta tanto en temática como en cantidá de places.

No que se refier a la capacitación llingüística fiximos un esfuerzu bien importante na estensión de los cursos d’inglés. Nel nuevu mandatu vamos siguir con una ufierta amplia y permanente.

Amás, vamos poner en marcha una convocatoria pa la cofinanciación de formación esterna, por exemplu, certificaciones internacionales o actividaes formatives impartíes por organizaciones de prestixu nel ámbitu profesional.

Otru de los aspeutos relevantes d’actualización son les estancies nel estranxeru y les estancies n’empreses. Los programes de movilidá d’excelencia son una ferramienta fundamental pa l’alquisición de nueves competencies. Vamos siguir na potenciación de les convocatories esistentes aumentando los sos recursos y empobinándolos a les distintes etapes de la carrera académica. Proponemos un aumentu del númberu de movilidaes docentes hasta’l 10%, cola incentivación del reconocimientu nel plan docente de 8 hores por cada mes de movilidá, suxeto a un máximu de 24 hores per cursu y profesor o profesora.


Profesoráu asociáu, sustitutu y collaborador

Nestos cuatro años fiximos un esfuerzu notable por tresformar y sustituyir los contratos de les y los denominaos ´asociaos impropios´ amenorgando hasta la so desapaición les convocatories de places de 6 hores y aumentando la dotación de places d’Ayudante Doctor. Coles mesmes, aumentóse l’usu de la figura de profesoráu sustitutu pa cubrir les necesidaes docentes xeneraes por baxes llaborales o desempeñu de cargos académicos acordies col nuesu Conveniu Coleutivu de los Trabayadores (2013). Por aciu d’esta práutica garantízase que les sustituciones se faigan con contratos dignos evitando la contratación precaria nes figures de profesoráu asociáu y fomentando l’anovación de plantiyes. Nel próximu mandatu, vamos caltener esta llinia d’actuación que vamos complementar cola creación de bolses d’empléu que dexen a les árees cuntar con sustitutos cualificaos de mou urxente. El fin últimu va ser desaniciar la precariedá na contratación de PDI na nuesa universidá.


Profesoráu de Ciencies de la Salú

La creación del área de coordinación con Ciencies de la Salú averó’l gobiernu de la universidá al profesoráu vinculáu. Esti compromisu electoral dexa meyorar la interaición con un coleutivu que tien especiales carauterístiques pol so doble vinculación hospitalaria y universitaria. Ente otros resultaos positivos, convocáronse toles places de promoción de Profesoráu de Ciencies de la Salú que s’acreitaron cola “cesión de la tasa de reposición” pol SESPA y anováronse y ampliáronse les places de profesores asociaos de Ciencies de la Salú a un total de 182 nesti periodu.

Como oxetivos pal próximu periodu rectoral, proponemos llograr la regulación de la figura de Contratáu Doctor Vinculáu pa favorecer la carrera académica y la necesaria anovación de la plantiya de profesoráu vinculáu. Nesti momentu hai más d’una docena de profesoráu asociáu y mozos investigadores ya investigadores, con acreitación na figura de profesor Contratáu Doctor. La vinculación na figura de Contratáu Doctor dexaría-yos encarar un periodu transitoriu que facilitaría la so acreitación a Titular. Esta solución yá s’adoptó en delles comunidaes autónomes, por exemplu, n’Aragón, Castiella y Llión, Murcia, Galicia, Cantabria y Andalucía. El segundu oxetivu va ser reforzar la collaboración estrecha de la universidá cola Conseyería de Salú pa facilitar el llabor docente ya investigador de los Profesores Vinculaos y Asociaos de Ciencies de la Salú.

Un tercer oxetivu ye’l de dotar económicamente una Unidá Alministrativa nel Área Docente del HUCA pa facilitar xestiones del estudiantáu de grau y posgráu y del profesoráu de Ciencies de la Salú. Esta unidá podría ser tamién un sofitu a la descentralización del doctoráu y los másteres qu’agora se xestionen íntegramente dende’l Centru Internacional de Posgráu.

Vamos caltener les convocatories de places de profesoráu permanente naquelles árees onde haya profesoráu ayudante doctor acreditáu a contratáu doctor o titular, ensin restricciones d’antigüedá na plaza, esto ye, dende’l primer añu de contratu.

El profesoráu mayor de 60 años va poder disminuir progresivamente la so actividá docente, 1 creitu per añu hasta la xubilación.