Organización

Nestos cuatro años trabayamos con propuestes abiertes y algamamos consensos que se ficieron vidables nunes Rellaciones de Puestos de Trabayu pal Personal d’Alministración y Servicios. Sicasí, estos alcuerdos nun fueron a materializase por nun llograr l’aprobación de l’alministración autonómica. Estes propuestes conteníen los principios básicos d’homologación y adecuación de los puestos de trabayu, y alcordáronse llogrando un consensu mayoritariu. Énte la imposibilidá de sacales alantre en tola so dimensión, nesti últimu añu tuvo axustándose una nueva propuesta que dexa conxugar l’estrictu cumplimientu de les restricciones presupuestaries y les llendes llegales. Estes propuestes de cambéu de les RPTs van dexar resolver conflictos pasaos y dar un pasu na necesaria adaptación de les plantiyes a los nuevos tiempos qu’esixe la universidá actual y futura. El nuesu talante foi y va ser de diálogu y negociación hasta algamar el consensu. Pa ello creamos los foros de negociación afayadizos, tanto la Mesa Xeneral, como’l restu de les meses de negociación por coleutivu que dexaron algamar alcuerdos, como los rellativos a meyores pal personal de más de sesenta años, o’l de conciliación y teletrabayu, que nos ta ayudando a afaenos a esta situación xenerada pola pandemia.

Con esti mesmu talante y col máximu enfotu vamos sacar alantre rellaciones de puestos de trabayu acordies coles necesidaes d’una universidá moderna. Vamos revisar los niveles de los distintos puestos de trabayu p’axustalos al principiu de mesma función, igual nivel. Vamos incorporar a tol coleutivu d’indefiníos non fixos a la RPT del personal llaboral. Vamos axustar un nuevu reglamentu pa la regulación de los baremos del concursu de tresllaos y del concursu-oposición, xornaes estraordinaries, collaboración n’actos protocolarios, apertura d’aules d’estudiu, y el restu de les situaciones estraordinaries de prestación de serviciu. Y vamos ellaborar un plan de promoción interna que garantice la igualdá d’oportunidaes na carrera profesional.

Vamos consolidar los nuesos alcuerdos ampliando y meyorando los derechos nel ámbitu de la conciliación de la vida personal, familiar y llaboral; reglamentando les midíes y aiciones de planificación qu’aumenten y meyoren los derechos de la plantiya de mayor edá, y ellaborando un plan estratéxicu de captación del talentu pa “poner frenu al avieyamientu” y consiguir l’anovación de les plantiyes, asina como pa la realización de procesos d’estabilización y afitamientu del personal con empléu temporal.

No que se refier al personal llaboral, va siguise cola negociación del conveniu coleutivu, afayando les sos previsiones y los derechos nél recoyíos a la nueva realidá normativa, consolidando unes meyores condiciones de trabayu y ampliando l’ámbitu suxetivu pa incluyir al personal investigador en formación y al personal téunico de carauterístiques singulares qu’empresta servicios nel ámbitu de la investigación. Los nuevos alcuerdos van aplicase una vegada superaes les restricciones presupuestariu y llegalles a les que ta sometida la nuesa institución n’aplicación de les lleis de contención del gastu nel sector públicu.


Relevu xeneracional

Al igual que n’otres alministraciones públiques, el personal d’alministración y servicios de la nuesa institución tien una edá media demasiao alta, 52 años. Esta situación va provocar una alta tasa de xubilaciones na próxima década. Nesti contestu ye fundamental siguir les estratexes qu’afonden na necesaria renovación. Ésta tien de llevase a cabu por aciu de procedimientos que dexen la incorporación de persones nueves que refuercen y anueven los distintos servicios y unidaes de trabayu. Son especialmente relevantes dalgunos d’ellos, como los servicios d’informática y d’investigación. Nesta renovación va ser bien importante que la plantiya tenga la capacidá pa comunicase n’inglés.

Vamos afayar los nuesos procesos seleutivos, incentivando la incorporación de persones con conocimientos y habilidaes nel ámbitu de la xestión alministrativa, contractual y económica, nel conocimientu de la normativa específica universitaria, los idiomes y l’alministración electrónica.


Afitamientu del empléu

Vamos asegurar la política de xestión de personal nesta materia, afondando nes posibilidaes que la Llei de Presupuestos Xenerales del Estáu vaya estableciendo pa la conformación de les Ufiertes d’Empléu Públicu. Vamos esplorar, y vamos esplotar, como nos postreros cuatro años, les solicitúes énte’l Gobiernu del Principáu d’Asturies, llogrando aprobar el mayor númberu de places de la última década, y afayando les nueses necesidaes a les esixencies presupuestaria y normativa, y a los compromisos en materia d’inclusión, formalizando tolos cupos por discapacidá llegalmente esixíos nes nueses convocatories. La execución d’estes OPE, cola autorización de les correspondientes convocatories, supunxo la cobertoria de más del 75% de los puestos consideraos.

Esta xera, que constitúi ún de los llogros d’esti equipu rectoral, tien de siguise cola mesma esixencia y dilixencia pa llograr faer efeutiva esta política que ta sofitada en dos oxetivos básicos, la xusta promoción del nuesu personal y la necesaria rexeneración y actualización de les nueses plantiyes.

Per otra parte, toles alministraciones públiques coinciden na conveniencia d’entamar procesos d’estabilización de los sos recursos humanos. Nel casu de la Universidá d’Uviéu la execución de les socesives OPE nun dexó baxar la tasa d’interinidá per debaxo del 8%. Too ello, magar el desarrollu  d’un ampliu procesu de cobertoria de vacantes. Tenemos de siguir nesta llinia hasta llograr la plena estabilización del coleutivu de personal interín de la nuesa plantiya.

La baxada de la tasa d’interinos y la medría de puestos estructurales son pa nós un oxetivu irrenunciable. Vamos falar col Principáu d’Asturies pa llograr ufiertes públiques d’empléu amplies que dexen disponer d’una plantiya abonda de personal d’alministración, con estabilidá y futuru.


Formación continua

Nesti mandatu actualizamos la formación del personal d’alministración y servicios con nuevos cursos y temátiques. La formación y la capacitación tienen que ser un aspeutu prioritariu, darréu qu’afonden nel esfuerzu por modernizar y revalorizar el sistema de xestión pública universitaria. Poro, vamos favorecer que los planes formativos s’afayen a les necesidaes específiques de los puestos de trabayu, y dexen alquirir nueves competencies y habilidaes. Centrarémosnos, especialmente, nel conocimientu de les ferramientes TIC y de les competencies llingüístiques.

Vamos complementar la mesma formación coles collaboraciones del G-9 d’Universidaes y distintes alministraciones públiques. Amás, vamos contratar entidaes privaes especializaes pa les aiciones formatives más específiques, por exemplu, p’aspeutos rellacionaos con certificaciones de calidá (ISO 9000, ISO 2000, ISO 23500, etc.). Vamos reforzar, ampliando y aumentando la dotación de les ayudes al estudiu. Va concedese, asinamesmo, un protagonismu importante a la participación en programes d’intercambéu nacionales ya internacionales, de mou especial al traviés del programa Erasmus+.


Condiciones de trabayu

L’actualización de los nuesos procesos alministrativos tiene que ser daqué que nos ayude a meyorar la xestión. En munchos casos pola mor de les restricciones impuestes poles lleis y les alministraciones coles que collaboramos, y n’otres ocasiones pola nuesa mesma tradición, los procesos son perllargos y desaxeradamente complexos. Ye necesario encarar la so renovación. Por ello, vamos crear una comisión pa la “innovación nos procesos alministrativos”. Esta comisión va tar presidida por una persona del coleutivu d’alministración y servicios y va tener como oxetivu revisar tolos procesos alministrativos, proponiendo cómo meyoralos p’amenorgar los sos tiempos y el trabayu necesariu pa facelos.

Na mesma llinia vamos trabayar na actualización de los puestos de trabayu del personal d’alministración y servicios, tanto a nivel d’equipamientu como de material informático. Va desarrollase un programa d’implantación d’ordenadores portátiles y dock-stations pa dexar movilidá, teletrabayu y conciliación cuando asina se crea conveniente. Esto, xunto con servicios na nube y máquines virtuales, va dexar que’l teletrabayu nun seya más complexu, sinón una situación ventaxosa.

Tamién vamos actuar a nivel d’instalaciones. El nuesu plan de meyora pasa por xenerar nuevos espacios pa que’l PAS trabaye en meyores condiciones, con una ampliación de la distancia ente puestos de trabayu. Por exemplu, la recuperación del edificiu del caleyón de la Plaza de Riego va dexar ganar espaciu en condiciones d’accesibilidá pa los vicerrectorados y el Centru internacional de Posgráu y Escuela de Doctoráu.

La Universidá d’Uviéu, magar los años de crisis, caltuvo la so participación nel Programa d’Intercambéu d’Agospiamientos Universitarios dende la so fundación nel añu 1984. Siendo conscientes de l’alta demanda y la valoración pol personal d’alministración y servicios, ésti rectoráu apostó pol caltenimientu y afitamientu del Programa, recuperando progresivamente la ufierta de places hasta algamar les cuatrocientes actuales.

N’igual midida l’Aición Social ye un elementu que se vieno consolidando, a la escontra de les corrientes aplicaes n’otres alministraciones públiques, siendo un compromisu llograr permediar, non solo la so adaptación a les necesidaes, sinón tamién a les demandes de cada coleutivu.

Del mesmu mou vamos siguir tramitando les convocatories que llogremos reaniciar, y dar continuidá, rellatives al reconocimientu del Complementu de Promoción Retributiva del PAS llaboral, calteniendo los fondos yá consolidaos, dexando qu’esi reconocimientu seya con calter inmediatu. Vamos favorecer, en cumplimientu de lo dispuesto nel Conveniu Coleutivu, la concesión del Complementu de Responsabilidá p’aquel personal que nun lu tenga.

Vamos siguir impulsando la xubilación anticipada y vamos lluchar pola recuperación y ampliación de los supuestos del contratu relevu conforme a la normativa estatal y los criterios del Principáu d’Asturies.

El nuesu compromisu ye firme na recuperación total de los derechos perdíos nos años de los periodos de crisis económica que venimos encarando dende 2009, asina como’l d’aumentar los fondos destinaos a anticipos reintegrables. Incrementaremos los fondos destinaos a anticipos reintegrables aumentando la cuantía y el plazu maximu de devolución.

No referente a la Prevención de Riesgos Llaborales y Salú Llaboral, vamos afondar nel trabayu lleváu alantre nestos postreros cuatro años. Va haber continuidá y aumentu de recursos en y pa les campañes específiques de salú. Va favorecese una xestión con mayor dinamización del Comité de Seguridá y Salú, de mou que’l so exerciciu competencial se materialice n’aiciones y alcuerdos similares a la llinia d’actividá siguida a lo llargo d’esta pandemia. Y van impulsase, pal so afitamientu, les llinies de formación ya información qu’arreyen al personal na corresponsabilidá nel cumplimientu en materia de prevención de riesgos y salú llaboral; n’ámbitos como los Planes d’Emerxencia y Evacuación de los edificios, l’usu de los desfibriladores y l’ampliación na formación específica en diverses materies de salú y prevención.

Nesti mandatu anovamos la formación del personal d’alministración y servicios con nuevos cursos y temátiques

Vamos facer que los planes formativos s’afayen a les necesidaes específiques de los puestos de trabayu, y dexen alquirir nueves competencies y habilidaes

Va llevase alantre un programa d’implantación d’ordenadores portátiles y dock-stations pa dexar movilidá, teletrabayu y conciliación cuando asina se xulgue conveniente. Esto, xunto con servicios na nube y máquines virtuales, va dexar que’l teletrabayu nun seya más complexu, sinón que seya una situación más favoratible.