El nuesu plan pa los vinientes cuatro años va vertebrase al traviés d’un conxuntu d’elementos básicos que son fundamentales pal desarrollu d’una universidá.


La Universidá son les persones

Pa llevar a cabu la so misión docente, investigadora, de tresferencia y de tresformación social, la universidá tien d’esmolecese en primer llugar poles persones. Per un llau, pensar nel estudiantáu, que representa’l presente y el futuru de la mesma universidá, pero más importante, de la sociedá asturiana nel contestu llocal y tamién nel contestu global, como ciudadanos y ciudadanes d’un mundu globalizáu. Per otru llau, hai d’ocupase de les y los trabayadores de la institución, el personal d’alministración y servicios y el profesoráu, responsables direutos de llevar a cabu les misiones que componen los oxetivos de la institución universitaria. La nuesa aición de gobiernu va poner per delantre siempres a les persones faciendo los mayores esfuerzos en meyorar les condiciones de trabayu y estudiu, ufiertando oportunidaes de desarrollu profesional y, a lo cabero, consiguiendo una vida universitaria que nos enllene d’arguyu y satisfaición personal y coleutiva.


Una universidá teunolóxicamente avanzada

L’apueste pola teunoloxía nesti periodu foi bien importante con cuasi 2 millones d’euros añales invertíos en ferramientes informátiques. Anovamos práuticamente tola infraestructura, espardiendo la rede WI-FI y desendolcando un importante númberu d’aplicaciones informátiques. Amás, apostamos, con gran éxitu, pola alquisición de la llicencia Campus de Microsoft más completa pa tolos miembros de la comunidá. Sicasí, nun tenemos de cayer nel conformismu y hemos decatanos de que tamos bien lloñe d’una situación óptima. El futuru de la universidá depende de la teunoloxía y tenemos de caminar hacia un desarrollu inda mayor. La teunoloxía tien de dexar encarar procesos de xestión más áxiles, meyorar la educación a distancia y dar más facilidá d’accesu a la información. Poro, esta va ser ún de los pegollos de la nuesa aición de gobiernu y una de les fasteres d’espansión y crecimientu en recursos.


L’impactu nos sectores productivos

Ún de los aspeutos más criticaos de la ciencia española ye que’l so importante númberu de publicaciones nun produz l’impactu esperáu nel sector productivu. D’ehí qu’una exa d’aición relevante nuna universidá moderna tien de ser la tresferencia de conocimientu hacia’l sector productivu. La medría de los contratos con empresa y de mou bien relevante la creación de cátedres universitaries (venceyu permanente col sector productivu) empunxo la nuesa aición de gobiernu nestos cuatro años. Enanchar esta actividá ampliando’l númberu d’aiciones, pero sobremanera estendiéndoles a nuevos campos nos que tradicionalmente esistía menos tresferencia va ser un importante pegollu de la nuesa aición de gobiernu. Ye necesario crear nuevos espacios de collaboración, llaboratorios y parques científicos, tanto físicos como virtuales, onde se desarrollen proyeutos singulares y estratéxicos para la reactivación económica d’Asturies.


Reconocimientu ya  impactu internacional

La collaboración internacional ye daqué consustancial a la institución universitaria y nesti aspeutu la evolución de la Universidá d’Uviéu nos postreros cuatro años foi bien notable. La nuesa posición n’Europa ye sólida y llogramos afitar progresivamente la nuesa rellación con Asia y América. El nuesu progresu foi espeutacular nestos cuatro años, tanto na espansión de la nuesa actividá internacional como’l so reflexu nos fondos recibíos. El nuesu afitamientu nel ranking de Shanghái como una de les 500 meyores universidaes del mundu o les nuesos perbonos resultaos en sostenibilidá ambiental son una amuesa d’ello.

Cada vegada resulta más necesario sofitar la internacionalización de los campus, facilitando la incorporación d’estudiantáu procedente d’otros países y sistemes y apostando por una movilidá más amplia, pa lo que tienen de garantizase programes y alcuerdos ente universidaes, empreses, ya instituciones españoles ya internacionales, sobremanera les d’ámbitu européu. La nuesa Universidá ta firmemente comprometida cola internacionalización de los sos campus y prueba d’ello ye la nuesa insistencia en lliderar un proyeutu d’Universidá Europea. Aliances  como AURE (Alianza d’Universidaes Ruses y Españoles), proyeutos internacionales, movilidaes y cooperación global van ser elementos fundamentales na nuesa aición de gobiernu.


Una Universidá inclusiva ya igualitaria

La diversidá ye un fechu nes sociedaes occidentales y la universidá nun ye ayena a esta realidá. Ye necesario caltener l’impulsu na atención a les persones con necesidaes específiques, diseñar mecanismos más fuertes d’actuación énte casos d’acosu y llograr la plena integración de les muyeres en condiciones d’igualdá efeutiva colos homes. Nesti sentíu, el diagnósticu de la (des)igualdá, publicáu en marzu d’esti añu, foi’l puntu de partida p’actualizar el plan d’igualdá y entamar la correspondiente negociación de nueves midíes coles fuerces sindicales.

Nesti mandatu avanzamos significativamente al traviés d’estremaes aiciones pa desarrollar una universidá más inclusiva. Punximos en marcha los protocolos frente al acosu y de cambéu de nome nos procesos de cambéu de sexu. Introduximos la identificación al traviés del nome sentíu. Iguamos los baños pa faelos unisex. Afayamos distintes instalaciones pa meyorar la so accesibilidá. La puesta en funcionamientu del Comité d’Ética y la ellaboración d’un Códigu Éticu, según les meyores na aplicación de la Llei de Memoria Histórica, asítiennos na vanguardia de les universidaes españoles en términos d’inclusión. Sicasí, el camín por percorrer entá ye llargu. Vamos Siguir desarrollando proyeutos p’algamar esti oxetivu irrenunciable.


Una Universidá caltenible

Va unos años el planeta pidiónos un cambéu na nuesa forma de vivir. Nun podemos siguir consumiendo recursos como si fueren ilimitaos. Nun podemos contaminar ensin más, porque toos y toes sufrimos les sos consecuencies. La universidá ha ser un referente y exemplu de sostenibilidá. El nuesu papel de llideralgu foi claru, non solo al traviés de los nuesos proyeutos de sostenibilidá, sinón que nos punximos al mandu de toles universidaes españoles na sectorial CRUE Sostenibilidá. Tomando como puntu de partida la nuesa Memoria de Responsabilidá Social, la completa alliniación de la nuesa institución colos oxetivos de l’Axenda 2030 va ser pa nós otra referencia na aición de gobiernu.


Una Universidá pa tola vida

La universidá del sieglu XXI ta sufriendo fondos cambeos. La esixencia social, la competencia y la necesidá de formación continua, faen de la universidá daqué más que la institución a la que s’apuerta a los 18 años y na que s’algama la graduación unos años dempués. Esta nueva universidá tien de ser un puntu de referencia cultural, educativu ya investigador en cualquier etapa de la vida. Ye por ello que nestos años desarrollamos programes y actividaes que van dende los 3 años hasta los 90. Espertamos voluntaes científiques nes y los más pequeños, que van ser los nuesos futuros veceros. Afalamos l’interés de los adolescentes y ufiertamos amplies posibilidaes culturales y formatives a los nuesos egresados seya la que seya que la so edá. Dímos-yos puxu a los títulos d’espertu, al Programa Universitariu pa Mayores y a la Estensión Universitaria como nunca se fixere. Amás, pa consiguir mayor vinculación, fexemos el Club Alumni UO 360°. El venceyu cola universidá ha ser pa tola vida. Y tenemos de ser un referente na vida y cultura d’Asturies pa cualquier edá y condición.


Motor de reactivación social

El serviciu públicu qu’empresta la universidá nun tien de llindase a los sos cometíos básicos dientro de les sos aules y llaboratorios, ha ser una institución que contribuya de forma efeutiva a la dinamización de la sociedá asturiana, tanto como motor cultural qu’afale’l nivel cultural de la población del Principáu d’Asturies, como siendo parte activa de la necesaria reactivación económica que precisa la nuesa comunidá autónoma. La universidá tien de ser reconocida, cada vegada más, como un espaciu de formación de llíderes y llidereses y el mayor ascensor social de que disponemos nel sieglu XXI hacia esa sociedá más xusta y bayurosa con una economía dinámica y afitada nel conocimientu y la teunoloxía.


La Universidá que mira al mundu dende Asturies

El mundu foi camudando de paradigma académicu, cultural y económicu nes últimes décades nun contestu globalizáu que, enfocáu dende la sostenibilidá, nun dexó enxamás de llau la cultura llocal como referencia. Y nesi marcu trabayamos estos postreros cuatro años: intensificando la rellación de la Universidá d’Uviéu col territoriu que l’abelluga, amestando a la so comunidá nel texíu socioeconómicu que la sostién, utilizando la llingua que fuimos a crear y cultivar y normalizando les nueses tradiciones y costumes, axuntándoles coles que nos lleguen d’otros pueblos y territorios colos que queremos siguir faciendo crecer el nuesu estudiantáu y la nuesa visión abierta del mundu. Un mundu, a lo cabero, que precisa miraes globales ensin escaecer quién somos, d’ónde venimos y a ónde nos pruye llegar, con una visión y una comunicación global al empar que llocal.


La busca d’una financiación xusta

Los recursos financieros constitúin el combustible imprescindible pal funcionamientu d’una institución pública d’enseñanza superior. La Universidá d’Uviéu y el Gobiernu del Principáu d’Asturies roblaron un alcuerdu de financiación de la universidá en 2017, vixente hasta 2022, que foi pioneru n’España y que nos dio un marcu d’estabilidá financiera. Magar el plan de financiación ta desenvolviéndose razonablemente bien, l’aportación de recursos pa proyeutos estratéxicos inda ye escasa, especialmente no referente a les infraestructures y a la captación de talentu.

N’España, cola llegada de la crisis económica en 2008 y l’emerxencia fiscal arreyada a la mesma, la respuesta gubernamental al respective de la financiación pública de les universidaes carauterizóse por una disminución de los recursos y la paralización de munchos planes de financiación de la investigación.

Pa superar esti bloquéu económicu, ye necesario diseñar un nuevu modelu de financiación de les universidaes públiques por aciu d’una cuantía basal que cubra los costos estructurales y s’acompañe d’una financiación global por resultaos abondos pa encarar los retos que la sociedá nos pide. Ésti va ser un oxetivu y un retu irrenunciable de la nuesa aición de gobiernu.


Descentralización y autonomía

Hai una máxima que diz que’l gobiernu funciona meyor cuanto más averáu ta d’aquelles y aquellos a los que gobierna. Na universidá esti principiu sofítase na idea de que centros, departamentos ya institutos d’investigación tengan la máxima capacidá de xestión. Ye por ello que les regulaciones diseñaes pola universidá tienen de da-yos la máxima autonomía para enfrentase a realidaes bien distintes. Dende llueu esto ha dir acompañao de recursos abondos pa poder xestionar esa autonomía. La medría de los sos presupuestos, l’asignación de recursos humanos pa la xestión, y personal téunico, xunto col fondu respetu a l’autonomía de centros, departamentos ya institutos foi pa nós una exa de la nuesa actuación estos cuatro años y tornará selo nel próximu mandatu.

Cola aplicación recién del nuesu Códigu Éticu, que va empobinar les rellaciones de la institución y les del so personal con entidaes y empreses esternes, vamos llograr una universidá más responsable, más xusta y más comprometida.

Dímos-yos puxu a los títulos d’espertu, al Programa Universitariu pa Mayores y a la Estensión Universitaria como enxamás se fexere.

Llevamos alantre programes y actividaes que van dende los 3 años hasta los 90, espertando voluntaes científiques nos más pequeños, que van ser los nuesos futuros veceros