Réxime de progresu y permanencia

El cambéu del réxime de progresu y permanencia foi una de les grandes reivindicaciones nes elecciones del 2016. Esti equipu fexo de so esti pidimientu camudando la normativa pa facilitar la continuidá y finalización de los estudios. Los resultaos de l’aplicación del nuevu reglamentu fueron estraordinariamente positivos. Sicasí, dempués de cuatro años d’esperiencia, ye’l momentu d’introducir meyores como la posibilidá de baxar de 90 a 60 el númberu de creitos necesarios pa permanecer na institución dempués del tercer añu. Vamos trabayar nestos nuevos cambeos debatiendo cola representación estudiantil na Mesa del Estudiantáu y esponiéndolos a la comunidá universitaria, enantes de la so aprobación nel Conseyu Social de la Universidá.

Ye importante resaltar que la universidá favoreció la consideración de les circunstancies de la pandemia y los sos efeutos nel rendimientu del estudiantáu como una causa a contemplar na concesión de la permanencia na universidá pal cursu 2020/2021, beneficiando a numberosos estudiantes afectaos por esta situación. La esperiencia d’estes aiciones, y la persistencia de los efeutos de la pandemia, va faer que puédamos siguir aplicándoles a lo llargo de los próximos cursos, meyorando la so xestión y afaciéndoles a les nueves situaciones del estudiantáu. D’esta forma vamos garantizar que nengún estudiante seya espulsáu de la universidá por nun algamar los criterios de progresu y permanencia.


Contratos y ayudes

Pa nós ye un oxetivu irrenunciable’l que naide tenga d’abandonar los sos estudios universitarios por falta de recursos económicos. Poro, xubimos el númberu d’ayudes a les matrícules pa dar cobertoria a toles solicitúes. Les nueves situaciones que surdieron por cuenta de la pandemia impulsáronnos a poner en marcha nuevos mecanismos de sofitu al estudiantáu con necesidaes sobreveníes, como la estensión gratuita de matrícules al cursu 2020/21 y el sofitu pa la fienda dixital pal presente cursu académicu. Nel nuevu mandatu vamos siguir avanzando nesta filosofía de sofitu económicu al estudiantáu.

Per otra parte, la importante meyora nel abaratamientu de tases académiques foi ún de los llogros d’esta etapa de gobiernu. Creemos nuna educación superior como un serviciu públicu universal y gratuitu nes universidaes públiques, por ello vamos siguir coordinando les nueses actuaciones dende la universidá, en sintonía col Conseyu d’Estudiantes, hasta llograr del gobiernu del Principáu d’Asturies nueves rebaxes nes tases académiques nos próximos cuatro años.


Formación complementaria y continua

Nos últimos años la formación complementaria tomó una relevancia bien importante nel currículu. Conscientes de la necesidá de facer una ufierta amplia, púnxose en marcha de mou esperimental la posibilidá de cursar asignatures de toles titulaciones, como por exemplu les d’idiomes ya informática, pa cualquier persona qu’estudie na Universidá d’Uviéu. D’esta forma va poder matriculase, a precios públicos, durante cursa otra titulación. Esta esperiencia constitúi un pasu inicial y complementariu, qu’inspira la puesta en marcha del conceutu de grau abiertu, que va dexar, dientro d’unes pautes xenerales, una formación individualizada al traviés de la elección llibre de materies. La implantación d’estes titulaciones na Universidá d’Uviéu va ser ún de los oxetivos pa desarrollar nos próximos cuatro años.

Per otru llau, dende la Institutu d’Investigación ya Innovación Educativa (INIE) y la sección de títulos propios punximos a disposición de la comunidá universitaria la mayor ufierta formativa, en cantidá y variedá, programada hasta agora na universidá. Nel próximu mandatu vamos incluyir nueves materies, afayando la ufierta a la demanda de formación tresversal y d’actualización de conocimientos pa la comunidá universitaria, pero abierta a la sociedá. La formación posterior a la finalización del máster va ser otru elementu d’actuación al traviés de la potenciación de los títulos propios.


Movilidá

Nos caberos años batimos el récord nel númberu d’estudiantes Erasmus de la universidá y pretendemos siguir xubiendo los sos númberos, darréu que la esperiencia Erasmus, o de los nuesos programes de movilidá polo xeneral, ye una de les más valoraes nel currículum profesional per parte de les entidaes empleadoras. Vamos potenciar la internacionalización, l’aprendizaxe d’idiomes y les estancies nel estranxeru, elementos que se revelaron como disruptivos a la de valorar el currículum d’un profesional. P’acreitar les actividaes rellacionaes cola internacionalización, proponemos la creación d’un Certificáu d’Intensificación Internacional que se va otorgar al estudiantáu que cumpla dellos requisitos sobro competencies llingüístiques n’idiomes y estancies d’estudiu y/o investigación nel estranxeru. Dende la Fundación Universidá d’Uviéu y en Collaboración con Asturex, vamos entamar nueves oportunidaes de práutiques profesionales, n’empreses asturianes nel estranxeru o n’organismos internacionales, tales como’l BID, OEA, CERN o ONU ente otres.


Empleabilidá

Una de les nueses mayores esmoliciones d’estos años foi la empleabilidá de los nuesos egresaos y egresaes. Ye por ello que la formación de calidá foi ún de los nuesos principales retos. Sicasí, el contestu global, cambiante y competitivu, indícanos qu’esto nun ye abondo. El conocimientu alquiríu nos estudios universitarios ha incluyir competencies tresversales en materies tan importantes como emprendimientu, dixitalización, habilidaes sociales, sostenibilidá, ente otres. Pa algamalo punximos en marcha formaciones específiques y programes de descubrimientu de talentu y emprendimientu (ChampU, Dream Big, Explorer, Cites con Éxitu, etc.). Impulsamos les cátedres d’empresa que dexen que’l texíu productivu nos acompañe nel llogru de tales competencies por aciu de presentaciones y práutiques. Amás, dimos nueva vida al Foru d’Empléu y potenciamos el Programa Suma Talentu de práutiques pa recién titulaos y titulaes.

Pa esti nuevu mandatu vamos ampliar los nuesos programes de descubrimientu de talentu y emprendimientu. Vamos buscar aumentar el númberu de práutiques de beques remuneraes. Amás, vamos poner en marcha una amplia ufierta de cursos y temes educativos sobro competencies tresversales nel nuesu campus virtual que seyan gratuitos pa la comunidá universitaria. Vamos potenciar, con ayudes económiques, les actividaes d’aprendizaxe por proyeutos desendolcaes pol coleutivu del estudiantáu como clubes, lligues d’alderique, asociaciones (Drone4student, talleres artísticos, de teatru, MotoStudent, Fórmula Student, Radio Universitaria), cooperación internacional, cambéu climáticu o Axenda 2030.

Más allá de les aiciones que busquen complementar la formación alquirida nos nuesos graos y másteres, vamos trabayar pa que seyan les mesmes titulaciones oficiales les qu’incorporen competencies entamadores.

Per otru llau, esmolecíos pola fuga de talentu hacia otres rexones españoles y europees, punximos en marcha’l Club Alumni 360⁰ UO, una iniciativa que queremos potenciar nos próximos años y que ta llamada a favorecer la incorporación llaboral y a promover la xeneración d’oportunidaes d’empléu, actividá productiva y riqueza na redolada próxima.


Vida universitaria

La universidá ye un espaciu de desarrollu personal, por eso ye clave cuntar con fasteres que faciliten la convivencia, la práutica deportiva o les rellaciones sociales. A lo llargo d’esti mandatu resolvimos, con un esfuerzu económicu importante, el caltenimientu d’unes condiciones afayadices pal bon desarrollu de l’actividá académica. Afayamos les condiciones de contratación pa que nes nueses cafeteríes y máquines espendedores tuvieren presentes los alimentos saludables y potenciamos les nueses zones verdes, ente otres actuaciones.

L’establecimientu de la Mesa del Estudiantáu xunto cola regulación del Paru Académico fueron finxos algamaos nesti mandáu, que nos asitien a la vanguardia del sistema universitariu español. Amás, fomentamos la participación na toma de decisiones con iniciatives como los presupuestos participativos que dexen a la comunidá universitaria determinar el destín d’una pequena cantidá del presupuestu. Tamién avanzamos, anque entá nun se materializaron, na puesta en marcha de les instalaciones que van allugar la Casa del Estudiantáu, con servicios pal coleutivu que van algamar a tolos campus universitarios.

Nesti nuevu mandatu, vamos meyorar les condiciones ambientales faciéndoles compatibles con una xestión enerxética más sostenible, amenorgando los consumos y la buelga de carbonu de la institución. Nesti sentíu, vamos proponer proyeutos de rehabilitación y adaptación de los nuesos campus dientro de la partida de 100M€ que’l Gobiernu va destinar a l’Axenda Urbana onde los campus universitarios tienen de ser oxetu d’atención singular. Vamos diseñar espacios sociales siguiendo la llinia del proyeutáu pal Campus d’El Cristu, onde destaquen zones verdes, aparcamientos pa bicicletes, zones lúdicu-deportives y el desarrollu de los servicios de la Casa del Estudiantáu. Col mesmu oxetivu vamos buscar la cesión de la Residencia d’Oficiales del Campus d’Humanidaes, pa tresformala nun espaciu de convivencia, de servicios y d’agospiamientos pa estudiantáu y personal visitante. Nos Campus de Xixón y Mieres, que disponen d’amplios espacios esteriores, vamos desarrollar nueves zones de convivencia, curiando les redolaes pa que seyan espacios de vida saludable.

A lo llargo de la presente situación de presencialidá controlada y de distancia social nos nuesos campus fiximos un gran esfuerzu pa utilizar tolos espacios disponibles y dotalos de les condiciones d’usu más saludables. Nesta llinia vamos apurrir soluciones imaxinatives que dexen l’usu d’espacios abiertos, con un moblame urbanu cenciellu y versátil que faciliten la distancia social y l’usu de la rede wifi de la universidá en condiciones de seguridá y comodidá.

Les nueves iniciatives que tamos favoreciendo, dalgunes en fase de proyeutu y otres n’execución, tán empobinaes a averar llugares de serviciu y alcuentru nos campus como comedores y servicios arreyaos a la Casa del Estudiantáu, en llinia col que ta proyeutáu pa la llosa sobro l’aparcamientu d’El Cristu frente a la Facultá de Bioloxía.

Vamos poner a disposición del estudiantáu l’accesu a una gran flota de vehículos eléctricos pa facilitar la movilidá a los campus ya intercampus, nel nuesu enfotu de siguir meyorando’l tresporte universitariu, Otra llinia d’actuación va ser meyorar y perfeccionar l’alministración electrónica integral de los trámites del estudiantáu, na que consiguimos meyores importantes. Vamos entamar l’alquisición y puesta a disposición d’un parque d’equipos informáticos en préstamu pa les y los estudiantes que los precisen. Esta dixitalización tien de complementase col accesu a les plataformes dixitales de testos y materiales didáuticos de sofitu a la docencia, con un usu que va xeneralizase nos los próximos años.


Residencies y agospiamientos

Cola reapertura de la Residencia Universitaria Altamira y de les instalaciones universitaries d’El El Branil.lín en Payares completamos la puesta en funcionamientu de tolos agospiamientos de la universidá. Esto ha ser acompañao d’un nuevu reglamentu de Colexos Mayores y de meyores en toles instalaciones, como la renovación integral de la rede WI-FI. Amás, creamos un programa de beques pa fomentar l’usu de la Residencia Universitaria de Mieres.

Nesti nuevu mandatu vamos encarar dos importantes retos. El primeru va ser licitar la Residencia Universitaria pal Campus de Xixón/Xixón. Tres los intentos fallíos per parte del Conceyu de Xixón/Xixón, tamos trabayando pa dar un nuevu enfoque a la llicitación que dexe tener éxitu al proyeutu. El segundu va ser la renovación del Colexu Mayor San Gregorio p’afayalu a los estándares actuales que la so modernización fai necesario, ensin arrenunciar al espíritu colexal tan invocáu polos y les residentes. Coles mesmes, nun vamos refugar nenguna posibilidá de cuntar con un mayor númberu de places d’agospiamientu nel rodiu de los campus, al traviés de fórmules de cooperación con distintes alministraciones y empreses, como ye’l casu de l’ampliación del Campus d’El Cristu.

Al empar, y reparando erros históricos, punximos en marcha’l proyeutu de recuperación y rehabilitación integral de les Colonies Escolares de la Universidá d’Uviéu en Salinas, que s’atopaben n’estáu d’abandonu. Esto va dexanos disponer d’un importante espaciu que nos facilitará encarar actividaes na zona d’Avilés-Castrillón nes que ye necesario agospiamientu.


Internacionalización del estudiantáu

L’atracción d’estudiantes internacionales ye, posiblemente, ún de los nuesos mayores retos como institución, darréu que ye fundamental p’ayudar a desaniciar la despoblación, atrayer talentu y crear iniciatives empresariales n’Asturies. Les actuaciones más intenses tienen de faese en másteres y doctoraos, onde se fai la especialización y amás podríamos captar persones p’anovar la nuesa plantiya. Vamos poner en marcha, xunto col Principáu d’Asturies y los axentes institucionales, un Programa d’ayudes de matrícula y d’agospiamientu nel Campus de Mieres. El nuesu oxetivu ye convocar 100 ayudes añales en programes de máster y de doctoráu, incluyendo un Programa de Doctoraos Industriales, coles empreses que desarrollen I+D+i nel Principáu d’Asturies. Esta iniciativa va complementase con un Programa pilotu de promoción al traviés d’axentes de captación de talentu empobináu a fasteres específiques, nun númberu llindáu de países, con especial atención a Llatinoamérica.

Una estratexa indispensable ye impulsar la internacionalización del nuesu estudiantáu. Proponemos aumentar del 33% actual (partiendo d’un 21,43% en 2016) al 50% del porcentaxe de titulaos y titulaes con una esperiencia internacional. Pa llograr esti oxetivu, vamos desarrollar una etiqueta o mención de titulación internacional a les titulaciones qu’algamen el 50% d’egresaos con esperiencia internacional d’estudios o práutiques y vamos poner en marcha un incentivu na financiación a los programes de máster y doctoráu qu’incluyan la realización d’una movilidá internacional como requisitu pa la titulación.

El nuesu plan ye crecer entá más na captación de fondos europeos, tanto Erasmus tradicional como Erasmus+, con países fuera de la UE, onde yá nos asitiemos nel top 10 ente les universidaes españoles, triplicando la nuesa captación de fondos (de los 1.049.000€ de 2016 a los 2.872.500 € de financiación nesti añu).

La medría de la competencia llingüística del estudiantáu va marcar una diferencia na competitividá de les y los egresaos universitarios. Vamos aumentar el porcentaxe de egresaos y egresaes con certificación oficial de nivel B2 en llingua inglesa, promoviendo la sustitución gradual de les pruebes d’idioma n’inglés de La Casa de les Llingües por pruebes online APTIS.

Vamos promover el conocimientu d’otres llingües sobremanera les europees y l’asturianu, reconociendo institucionalmente la competencia n’otros idiomes como méritu nel accesu a les titulaciones de máster o ayudes de la universidá, ente otros procesos competitivos.

Toes estes estratexes d’internacionalización del nuesu estudiantáu van figurar na creación del Certificáu de Intensificación Internacional. Esti certificáu va axuntase al currículum formativu del estudiantáu que cumpla dellos requisitos llingüísticos y de movilidá internacional. Esti valor añedíu busca favorecer l’insertamientu llaboral.


Equipamientu docente

Nos postreros trés años desarrollamos un plan de renovación de llaboratorios ensin precedentes, con una inversión superior a los 850.000 Euros. A esti plan de renovación d’equipamientu de llaboratoriu súmase’l refuerzu al programa de renovación d’ordenadores de les aules d’informática, pol que s’anovaron más de 1.400 equipos nos postreros 4 años. Nesta etapa instaláronse más de 300 nuevos puntos d’accesu WI-FI algamando un 100% de cobertoria en 16 edificios destinaos principalmente a la docencia y faciendo meyores puntuales n’otros edificios.

Nesti nuevu periodu, vamos centrar los nuesos esfuerzos en dotar gradualmente a les nueses facultaes y escueles, y nel so casu a los departamentos, de programes d’ayudes pa la modernización de los sos llaboratorios. Vamos entamar un Programa d’alquisición de llicencies de software educativu siguiendo la esperiencia qu’adquirimos col Programa MATLAB, la llicencia Acrobat DC y la llicencia Campus de Microsoft. Especialmente vamos favorecer la introducción progresiva y xeneralizada de simuladores como sofitu a la docencia práutica. Vamos plantegar una versión actualizada del Campus Virtual na nube pa superar les llimitaciones de recursos. Vamos meyorar la rede WI-FI hasta consiguir un 100% de cobertoria en toes nueses instalaciones y vamos poner en marcha nuevos espacios de coworking y sales d’estudios. Vamos esparder el conceutu de biblioteca virtual incorporando nuevos tipos de publicaciones y plataformes de llibros electrónicos, en collaboración colos programes nacionales promovíos por REBIUN en CRUE y pol Grupu 9 d’Universidaes.


Encuesta Xeneral d’Enseñanza y Análisis del nivel de satisfaición

Ún de los elementos más importantes de los que dispón una organización pa conocer los sos niveles de calidá son les encuestes a los sos grupos d’interés. Nes universidaes esta idea treslládase a una encuesta xeneral d’enseñanza que pregunta al estudiantáu pola so esperiencia nes distintes asignatures que cursó. Nos últimos años esta encuesta féxose de forma electrónica al traviés d’una plataforma web y d’una aplicación pa móvil. Esta combinación dexó que’l númberu de respuestes xubieren un 15%. Nesti cursu púnxose en marcha una encuesta xeneral de la enseñanza anovada, más áxil y versátil na so cumplimentación.

Nesti nuevu periodu vamos trabayar p’aumentar l’impactu de la encuesta xeneral d’enseñanza estableciendo nuevos mecanismos qu’incentiven la so realización y visualicen les meyores que se deriven del so análisis. Tamién vamos desarrollar otres encuestes al estudiantáu pa conocer en detái la so opinión de la universidá a nivel xeneral, meyorando les que se llevaron y se lleven a cabu pa conocer el desarrollu de la docencia nes condiciones de docencia mista o docencia online. Vamos intensificar el siguimientu de les persones egresaes, implementando sistemes más efeutivos pa conocer la so opinión sobro la efeutividá de los programes universitarios na so proyección llaboral y personal. Amás, vamos realizar consultes específiques pal sector productivu que nos dexen conocer la demanda de perfiles llaborales y les faltes que puen afectar a les nueses y los nuesos titulaos.


Orientación pal futuru

Conscientes de la relevancia de la orientación al estudiantáu, tanto enantes como a lo llargo de los estudios, reforzamos los planes d’aición tutorial esti mandatu. Pal próximu periodu, vamos avanzar nestos planes buscando aumentar el so algame. Vamos introducir nuevos temes nes nueses aiciones como’l medioambiente y la protección del planeta, dientro d’un plan de sostenibilización curricular. Vamos trabayar en destacar la importancia de les asignatures venceyándoles a les sos salíes llaborales pa que l’estudiantáu conoza la so importancia y meyore la so motivación. Vamos incidir na formación tresversal, nel llideralgu y na esperiencia internacional como elementos básicos de competitividá y versatilidá  a la hora d’atopar o entamar un empléu.

Al traviés de les collaboraciones qu’establecimos con organizaciones profesionales, como Compromisu Asturies XXI o’l nuesu Club Alumni 360° UO, vamos potenciar el sofitu a los nuesos egresaos na busca d’empléu por aciu de cursos de formación y programes de mentorización. La nuesa ufierta de formación abierta, al traviés del INIE y del Centru d’Innovación Docente, va incluyir minicursos tipu NOOC pa quien vaiga preparar oposiciones, de mou especial pa les y los egresaos de los nuesos másteres profesionalizantes, de los que son bon exemplu’l máster de Formación del Profesoráu o’l de l’Abogacía.


La salú ye lo primero

La pandemia que sufrimos amosó la importancia de preocupase pola salú. Nesi contestu, paez obligao comprometese cola salú del nuesu estudiantáu. Vamos promocionar campañes d’espardimientu que dexen meyorar la salú mental y el bienestar de la nuesa comunidá universitaria darréu de la escepcional situación que tamos viviendo. Específicamente vamos dedicar atención a los problemes de salú carauterísticos de les y los doctorandos que, como detectó la Universidá de Berkeley (California), afecta a la metá de los que preparen la so tesis (síndrome del impostor, panorama competitivu, aisllamientu y culpa, conciliación, etc..).

Consideramos indispensable cuntar con un serviciu d’atención psicolóxica, que debería entamar na redolada de les y los profesionales de los grupos qu’investiguen nesti campu de la salú. Esti serviciu, gabinete d’atención o clínica, tien de constituyise como un serviciu a disposición de tola comunidá universitaria y abiertu a la sociedá.

Xubimos el númberu d’ayudes a matrícula pa dar cobertoria a toles solicitúes