Nuevos retos col mesmu enfotu

Nun hai nada que xenere más ilusión pal gobiernu d’una universidá que poder llevar alantre los sos proyeutos y decatase de que los oxetivos van cumpliéndose, que les promeses tresfórmense en realidaes. Les exes programátiques que conformen esti programa electoral surden de compartir y escuchar los enfotos y les esmoliciones de la comunidá universitaria, en definitiva, de vivir en y pa la nuesa institución académica. Na práutica suponen una meyora integral de la universidá que nos dexarán asitiala nun llugar cimeru nel panorama nacional ya internacional. Ye daqué qu’esperimentamos con munches de les propuestes que fiximos en 2016 y que, magar munches dificultaes, fueron cumpliéndose.

La nuesa aición de gobiernu va poner siempres per delantre a les persones, estudiantáu, personal d’alministración y servicios y profesoráu, va esparder les nueses posibilidaes teunolóxiques y va crear espacios de collaboración estratéxicos que contribuyan de forma efeutiva a la dinamización de la sociedá asturiana. Queremos avanzar na escelencia investigadora, n’inclusión, igualdá y sostenibilidá pa convertinos en puntu de referencia cultural, educativu ya investigador en cualquier etapa de la vida.

Queremos cuntar con una suficiencia financiera que dexe a la Universidá d’Uviéu xestionase de manera autónoma y descentralizada, priorizando la cogobernanza, ya intensificando la so rellación col territoriu que l’acueye, amestando a la so comunidá nel texíu socioeconómicu y cultural que la caltién.

Podéis tar seguros y segures que vamos siguir cumpliendo les nueses promeses electorales, rematando los proyeutos qu’equí se recueyen. Cuntamos pa ello cola ilusión d’un equipu anováu y con esperiencia, preparáu pa encarar nuevos retos col mesmu enfotu y col mesmu espíritu de serviciu a la comunidá universitaria y a la sociedá asturiana.

“La ciencia española fai milagros
con poca financiación”

Margarita Salas

“Ye inxusto que la sociedá pierda’l talentu de les muyeres”
Mary Beard

Ún enxamás ve lo que se fixo, sinón
que ve lo que queda por facer

Marie Curie